Forside » Arbeidsområder »
Framtida for norsk matproduksjon og landbruket i fjellbygdene
Torunn H. Kornstad 27.01.10
Velkomen til seminar om framtida for norsk matproduksjon og landbruket i fjellbygdene! Seminaret skal vera på Lillehammer 9.-10. mars og tar for seg dei globale utfordringane knytta til matproduksjon og klima, og kva for verknader desse får for den norske matproduksjonen, med spesielt fokus på fjellbygdene. Arrangør er Bioforsk Aust, i samarbeid med Oppland fylkeskommune og Fjellregionsamarbeidet.
Vil mjølkekua framleis vera med og skapa arbeidsplassar og kulturlandskap i fjellbygdene i framtida?
Regjeringa har starta arbeidet med å forme ut ein ny landbrukspolitikk. Framtida for norsk landbruk og matproduksjon vil i stor grad vera prega av utviklinga internasjonalt. Dei sterkaste drivarane her er klimaendringane, kampen om jordbruksareala, folketalsveksten og endringar i matvanane, spesielt i Asia. Desse utviklingstrekka er så sterke at ein no talar om ei komande matkrise.
Den nye landbrukspolitikken vil ikkje berre stake ut kursen for landbruket i Norge, men også for den generelle utviklinga ikkje minst i fjellbygdene og i fjellbygdfylka. Saman kan vi skape ny optimisme og stoppe nedlegginga av landbruket i Noreg og fjellbygdene våre.
Målet for seminaret er å setta søkelyset på kva for moglegheiter og utfordringar matkrisa og klimaendringane gir for det norske landbruket, med eit særleg fokus på landbruket i fjellbygdene. Med bakgrunn i dette ønskjer arrangørane å få fram innspel til den nye stortingsmeldinga om landbrukspolitikken, som skal utarbeidast i 2010 og 2011.
Innleiarane Jacob Lundberg frå FAO og Asbjørn Aaheim frå Cicero vil fortelja om utviklinga i verda knytta til matvaresituasjonen og klimatilhøva. Hildegunn Gjengedal, som har arbeidd ved den norske landbruksdelegasjonen til EU, vil snakke om EU sin revisjon av landbrukspolitikken, medan Helge Christie tar for seg korleis ei matkrise kan verke inn på WTO-forhandlingane. Det blir også innlegg knytta til endringar i dei norske rammevilkåra for jordbruksproduksjonen.
Landbruks- og matdepartementet vil vera aktivt til stades. Ekspedisjonssjef Frøydis Vold innleier om den nye stortingsmeldinga om landbrukspolitikken, som skal utarbeidast i løpet av 2010 og -11. Etter at faglaga i landbruket har kommi med sine synspunkt på kva som bør prege landbrukspolitikken i åra framover, blir det ein avsluttande paneldebatt.
Påmeldinga skjer via heimesida til Oppland fylkeskommune innan 5. februar. Fullstendig program for seminaret finn du her.
Kva blir framtida for landbruket i fjellbygdene? Bilete frå Hemsedal
Utviklet av Godt Sagt Kommunikasjon | Webredaktører: Torunn H. Kornstad og Ann Marit Holumsnes