Forside » Arbeidsområder »
European Mountain Convention 2010 på Lillehammer handlar om innovasjon
Tekst: Torunn H. Kornstad/Bilete: Lillehammer Turist
23.03.10
For fyrste gong legg Euromontana sin store, fjellpolitiske konferanse til Norge. Fjellregionsamarbeidet er medarrangør av konferansen, som går av stabelen 15.-17. september på Lillehammer. Tittelen på konferansen er “European Mountain Regions - A spirit of innovation”, og vi håpar at dei tre dagane på Lillehammer vil gje opp mot 400 deltakarar frå heile Europa kunnskap om og gode døme på innovasjon både frå Noreg og mange andre land.
Gjennom dei tre dagane vil det både bli studieturar, foredrag som gir grunnleggande innsikt i innovasjonsverksemd, og det blir parallellsesjonar der einskildtema innan innovasjon blir tekne opp. Ein stor sal er reservert til utstillingar der mange norske og nokre utanlandske aktørar vil profilere seg. Konferansen vil foregå på tre språk; engelsk, fransk og norsk.
Ved oppstart onsdag 15. september blir det studieturar i fjellområda i Oppland og Hedmark, der vi vil vise fram døme på innovasjon innan forskjellige område. På ettermiddagen har Euromontana sin generalforsamling. Torsdag blir det offisiell opning av konferansen, og det er invitert inn både ein EU-kommisjonær og ein norsk minister. Parallellsesjonane den fyrste dagen tar for seg emne innan utdanning, klyngeutvikling og internasjonalt samarbeid for å få fram innovasjon i fjellområda. Den siste dagen er parallellsesjonane retta mot praktiske døme, slik som innovasjon innan fornybar energi, utvikling av verneområde, skogforvalting og i offentleg sektor. Konferansen blir avslutta med ein rundebordskonferanse og ei oppsummering av president Andre Marcon i Euromontana, og vår eigen leiar for Fjellregionsamarbeidet; Svein Borkhus.
Sett av dagane 15.-17. september for å få nyttig fagleg påfyll og bygge nye nettverk ut i Europa! Eit førebels program for konferansen finn du her.
Endeleg program og invitasjon til konferansen blir sendt ut i slutten av mai. Deltakaravgift vil bli 100-120 Euro. I tillegg kjem mat og overnatting.
Utviklet av Godt Sagt Kommunikasjon | Webredaktører: Torunn H. Kornstad og Ann Marit Holumsnes